الاثنين، 4 أبريل 2016

أرادة هند عبد الهادي خلال عام مع انقاص الوزن وكيف فقدت 57 كيلو من وزنها


أرادة هند عبد الهادي خلال عام مع انقاص الوزن وكيف فقدت 57 كيلو من وزنها

مصر النهاردة | نقلنا لكم اليوم تجربة جديدة وهى قصة ارادة فتاة خلال عام مع انقاص الوزن حيث يوجد كثير من يعانون من زيادة فى الوزن ويكون ذلك عائق فى حياتهم اليومية وخطرا على صحتهم ويحاول الكثير على اتباع العديد من الانظمة الخاصة بخسارة الوزن من خلال الذهاب الى الطبيب او الاعتماد على الادوية الخاصة بالريجيم التى لاجدوي منها 

ولكن كل ما فعلته هند هو الاعتماد على نفسها والثقة بأرادتها وقدرتها على تحقيق ما تريده وفقط من خلال الأكل الصحي واتباع الرياضة بأنتظام .. ونترككم الان الى ما قالته هند فى تجربتها 

ودة اللى حصل فى سنه كامله 
من شهر مارس /٢٠١٥ الى مارس / ٢٠١٦
خسيت ٥٧كيلو 

فى ناس كتير بتسألني خسيتى ازاى ؟ ولما بقول بأكل اكل صحى بس ، بيفتكرونى مش عاوزة أقولهم ( مش سر القنبلة الهيدروجينية على فكرة ) بس هو دة اللى حصل انا خسيت كدة 😉 بأكل كل حاجه بطريقة صحيه ، يعنى بأكل لحمه مثلا بس من غير دهن تماما ، او بأكل طعميه مثلا بس مش مقليه بتكون معموله فى الفرن بنقطه زيت او فى طاسة تيفال وخضار وفاكهه كتير ، والعشا زبادي لايت بليمون بس ، ومية كتيييير . والحقيقه ان الاكل الصحى انعكس على صحتى وشكلى بشكل فاجأنى انا شخصيا ، فى الوقت دة بقى كنت بشتغل على نفسى نفسيا انى مثلا ديما اقول ان الشكولاته والشيبسى والبيبسي بيضرونى وبيرفعوا سكر الدم وبيوقفوا الحرق ،وان الفاكهه والتوست البراون والعيش البلدى والجبنة اللايت والشكولاته الكروناالدارك دول بيخلونى صحتى احسن وشكلى احسن ( والله وجه اليوم اللى اكل فيه الشكولاته الدارك) 😀😀 وأننا بناكل علشان نعيش مش بنعيش علشان نأكل وان السعادة موجودة فى حاجات تانيه كتير غير الاكل 👍 ولما بابا تعب فى شهر يوليو / ٢٠١٥ وعرفت ان حالته كانت جلطة فى الشريان التاجى الامامى فى القلب ودة سببله دهون على القلب وكوليسترول عالى وادوية توسعه شرياين وطبعا أدوية ضغط عالى ، حقيقى خفت عليه جداً ( وممكن أكون اتصدمت فى الحاله اللى وصلها وبجد كانت مفجأءه ) رغم ان بابا راجل مش تخين بس عرفت ان دة نتيجه للتدخين والعادات الغذائيه الغلط ، غير بابا كنت ببص على اى حد سنه كبير من قريبى او معارفى بلاقيه مريض سكر او ضغط او على الأقل رجليهم وجعاهم ، وانا مش حابه فى يوم من الايام أبقى كدة

فقررت احب نفسى وأغير نفسى. شكلى وصحتى ، وان احنا لما هنحافظ على جسمنا ( المعدة والكلى والاجهزة اللى فى جسمنا ) ربنا هيكافئنا بالشكل الحلو ودة اللى حصل ، الاكل الصحى بقى اتجاه لناس كتير جداً دلوقتى وانا شخصيا اعرف بنات وشباب كتيييييير بيأكلوا اكل صحى وبيلعبوا رياضة ومش بيقولوا معندناش وقت 😉 اللى عاوز حاجه بيعملها ، الأقوياء بس اللى بيوصلوا لأهدافهم ومبيتزلوش عن احلامهم ، اوعى تقولى ان عمرودياب الراجل اللى سنه عدى ٦٠ سنه وهو بالجسم الرياضى دة بيأكل بيتزا او بيفطر طعميه وفول غرقانين فى الزيت ، وان نيكول كدمن اللى اختاروها اجمل نساء الارض ٢٠١٥ 👸 لما سألوها بتعملى ايه وازاى محافظة على جمالك وشبابك فى السن دة قالت بأكل اكل صحى بلعب رياضة ٦ ايام فى الاسبوع واليوم السابع بأكل كل اللى نفسى فيه ( ودى نيكول كدمن مش اى حد يعنى )🌺 فى يوم من الايام كنت بكرة الزبادى وبشوف ان اللى اخترعها حد معندوش دم ولا ضمير ، النهردة لو مفيش زبادى فى البيت ممكن انزل مخصوص اشتريها لانها مهمه جداً فى تنظيم الهضم ، وكنت بكرة البطيخ وبحب المانجا 😍النهردة انا ممكن اكل طول اليوم بطيخ بس 😋والمانجا فى عز الموسم بتاعها بأكل واحدة بس فى الاسبوع وفى يوم من الايام مكنتش بحب المشى النهردة بمشى على الأقل ساعه فى اليوم 😍.

اخر حاجه عاوزة اقولها ان أسهل حاجه انك تحافظ على صحتك وأصعب حاجه انك تهمل صحتك وتتفاجئ فى يوم من الايام انك مضطر تأكل اكل معين مفروض عليك او تبقى ماشى بشنطة أدوية او انك تبقى فى عز شبابك ومش قادر تطلع السلم، اختار صحتك وسعادتك لان السعادة قرار

• Hind Abd El Hady • 

0 التعليقات :

إرسال تعليق